بدأت الحدوتة يوم 20 فبراير
2016 لما أخدت قرار إني أخس، وقرار حاسم، عشان أعمل دايت أو التزم بحمية غذائية
لأول مرة في حياتي، صحيح انا خسيت قبل الجواز لكن كان باستخدام الرياضة مع تنظيم
الوجبات بدون التزام واضح وساعتها خسيت تقريبا 12 كيلو.
المرة دي أنا كنت وصلت لوزن
التسعين 90، وبما إني طويلة فأنا كنت مش بدينة بس في نفس الوقت واضح عليا الوزن
الزائد، مع دهون كتير جداً خصوصا في منطقة البطن والأرداف، وده كان من أسباب تأخير
قرار إني أخس، واديت لنفسي قبلها أعذار كتير، زي أنا شكلي مش سيء أوي، أنا بحب
الأكل إزاي استغنى عنه، إزاي هعيش شهور على الأكل المسلوق من غير المكرونة حبيبة
قلبي؟ هل فعلا لو التزمت هخس؟
معرفش إيه السبب في إني أخدت القرار بالتصميم ده في الوقت
ده، بس فعلياً بدأت والتزمت، وعلى الرغم من إني مخستش أول أسبوعين زي ما الناس
التانية بتنزل رغم التزامي، وكل اللى خسرته أول أسبوع كان كيلو ونص وتاني أسبوع
كيلو واحد إلا إني بدأت السكة والمشوار.
النهاردة الصبح أنا الحمد
لله وزنت نفسي وكنت 68 ده بعد توقف شهرين عن الالتزام بالدايت، وبدأت السكة من
تاني في سبيل الأميال الثلاثة الأخيرة في السباق، أو الكيلوجرامات الثلاثة الأخيرة.
نزلت 22 كيلو خلال فترة ست
أو سبع شهور تقريباً، ناس كتير بتنزلهم في أسرع من كده، لكن انا اولاً مالتزمتش
بحمية صارمة تماماً زي غيري، ومستغنتش عن حاجات زي النشويات تماماً، وكمان كنت
مهتمة أكثر بالرياضة مع الحمية عشان أخسر دهون، وده اللى خلى شكلي فرق جداً جداً.
خلال الرحلة دي اللى لسه
مخلصتش وان شاء الله مش عايزاها تخلص اتعلمت حاجات مهمة زي:
1.
الدايت مش معناه أكل طعمه ماسخ ووحش نبلعه على مضض زي الدوا،
في أكل صحي طعمه شهي جداً ومفيد جداً.
2.
جسمك وصحتك وشكلك يستاهلوا التعب والمشوار.
3.
الرياضة مش حاجة إضافية بنعملها عشان نخس، ده أسلوب حياة،
ولازم يتعمل على الأقل 5 مرات في الأسبوع ولو على الأقل ربع ساعة.
4.
ممكن نعمل رياضة في كل مكان، جيم، في الشارع، في البيت،
في الفندق.
5.
اتعرفت على جسمي وهو محتاج ايه، وأزاي اكل اكل عادي
بكميات مشبعة زي المحشي والبشاميل والرقاق ووزني ميزدش، وده بحاجات كتير زي الصيام
العكسي وعدم الأفورة طبعاً.
6.
وصلت لمفهوم أن الاكل مش بيساعد في شيل الهم، ولا الحزن.
7.
أن الاكل اللى بيشتهيه بالليل وبيودي في داهية، ممكن
اكله الصبح اول ما اصحى وضرره أقل فليه أعمل كده في نفسي ادخل انام واصحى اضرب
اللى نفسي فيه.
8.
الدايت مش بيبوظ البشرة ولا شكل الوش، ولا الكلام الفاضي
ده.
9.
الأرز المكرونة والعيش مش ضرورين عشان نشبع والله، ممكن
نستغنى عنه بحاجات زي الخضار.
10. لما نبطل ناكل
حلويات وشكولاتة بصورة منتظمة لسانا هينبسط من طعم الفاكهة، ودي حقيقة اكتشفتها
بنفسي لأني مكنتش باكل فاكهة ابداً، ودلوقت مقدرش استغنى عنها.
فكرة المدونة هنا إني هجمع
الوصفات الصحية والخفيفة اللى جربتها خلال رحلتي، هقولها بالتفصيل، واتكلم كمان
شوييتين تلاته عن البرامج الرياضية، اولاً عشان متضعش حاجة من ذاكرتي ثانياً عشان
لو حد هيستفيد من الرحلة ويبدأ رحلته
