مراجعة برنامج Intensity

تدوينة صباحية باكرة ومتحمسة شويتين.

كنت ناوية أتكلم عن البرنامج ده لما أخلصه تماماً، لكن بما إني في نص السكة معاه، وجه الوقت أقيمه بيني وبين نفسي وشفت نتائج مرضية جداً محبتش استنى عليكم أكتر من كده.

البرنامج من 9 أسابيع بالضبط، 4 أسابيع + أسبوع تمارين recovery مريحة للعضلات + 4 أسابيع أشد

وبما إني عبرت مرحلة الأربع أسابيع الأولى حبيت إني أعرف وصلت لأيه والحمد لله شفت نتائج زي ما قلت مرضية جداً، وتقريباً نزلت معاه مقاس ملابس كامل وبعد ما كنت بلبس ساعات medium  وساعات small وصلت لبر ال small  الجميل بأمان.

ده مع الوضع في الاعتبار إني مش ماشية على نظام دايت في الشهر ده تقريباً، باكل أكل صحي مش أكتر وبكميات معقولة وعكيت حوالي أسبوع في النص، ومخستش تقريباً ولا جرام لأني في مرحلة التثبيت، وده دليل جديد على سحر الرياضة اللى بتغير الجسم حتى لو بطلنا الدايت وبدأنا تثبيت.

نتكلم بقى عن البرنامج بالتفصيل:

من أشهر البرامج الرياضية حول العالم، مشهور جداً ومدربه كمان شون تي معروف ببرامجه القوية، مؤثرة جداً بس شديدة وعنيفة.

مدة البرنامج: البرنامج بيتكون من 9 أسابيع، كل أسبوع 6 أيام رياضة ويوم أجازة.

مستوى اللياقة: يحتاج مستوى لياقة من متوسطة لعالية، يعني محدش يكون لسه بادئ رياضة ويجرب البرنامج ده، اللى هيحصله هو الإحباط وممكن إصابة كمان، لأزم في البداية الالتزام بالرياضة على الأقل 3 شهور بصورة منتظمة، ومش مشي بس مثلاً، لازم تكون رياضة متنوعة بين الكارديو وتقوية العضلات، ورغم كده.

نوعية التمارين: التمارين بتجمع بين الكارديو وال strength والسرعة الكبيرة، يعني هتعمل مثلاً تمارين ضغط بصورة مكنتش متخيل إنك تقدر عليها قبل كده، ويتحول التمرين ده لكارديو.

الترتيب: متكون من مجموعة فيديوهات ليها جدول معين بنمشي عليه، والفيديوهات بتختلف من الشهر الأول للشهر الثاني، في الشهر الأول الفيديو الواحد 40 دقيقة، في الشهر الثاني 60 دقيقة، وفي اختبار لياقة كل أسبوعين بتابع فيه تطور مستوى لياقتك.

كل فيديو بيبدأ ب 9 دقائق تقريبا تسخين ثم 9 تمارين إطاله، وبعد كده التمرين نفسه.

تجربتي معاه: أول أسبوع كان متعب طبعاً رغم إني أجلته كتير ولعبته بعد 8 شهور رياضة منتظمة تقريباً، لكن قدرت أكمل الفيديوهات للأخر، pure cardio أكثر فيديو أرهقني لكن الأسبوع الثاني كان أسهل كتير وبالعكس ال pure cardio بقى هو الفيديو المفضل ليا لأنه سريع وتمارينه مش متكررة في دورات زي بقية الفيديوهات.

تأثير التمارين: لياقتي زادت طبعاً، وبان فرق في الساقين كبير، والكتفين وجانبي البطن.

الأدوات: مش محتاج أدوات نهائي، غير مات لو بتلعب على أرض مش مريحة وده راجع ليك.

ملحوظة هامة: وشون تي دايماً بيأكد عليها، وضع جسمك وأداء التمرين بصورة صحيحة أهم من السرعة، ما تحاولش تجاري اللاعبين في السرعة وتعمل التمارين غلط، ده ليه عيبين، الأول استفادتك مش هتكون كاملة، والثاني احتمال الإصابة هيزيد.

كده خلصت مراجعتي للشهر الأول من البرنامج وهرجعلكم بعد الشهر الثاني قريب بأذن الله.

لتحميل البرنامج تورنت:

https://drive.google.com/file/d/0B5uC1ceKe_pXX1hOUXNNbWdyZ3M/view?usp=sharing

الأكل ليس صديقي الوحيد

من سنة وشوية وفي أيام شتوية زي دي كتبت مقال على موقع نون اسمه "شطيرة أحزاني" بتكلم فيه عن ساندوتش وقفت اعمله في نص الليل من الجبنة السايحة عشان كنت مرهقة جداً ومحبطة من كل حاجة، والساندوتش ده كان الحاجة الحلوة الوحيدة اللى في يومي.

في المقال تكلمت بشكل عام عن اضطرابات الطعام، وعن شكي إني مصابة بواحد منها أو ببدايات على الأقل، بما إني بعتبر الأكل صديقي الوحيد، والحاجة الوحيدة اللى بتخذلني واللي ممكن الاعتماد عليها.

ورفضي لفكرة الحمية الغذائية والدايت كان لنفس السبب، وفاكرة برضه بوست ليا على الفيس بوك كاتبة فيه انا لا يمكن اخس وابقى سمباتيك انا واحدة بتحب الأكل جداً ومتقدرش تستغنى عنه.

ليه بفتكر الكلام ده دلوقت وبوجع دماغكم بيه؟

عشان أنا بعاني الأيام دي من حالة اكتئاب سيئة جداً ممرتش بيها من شهور، وحاولت فعلاً الجأ للطعام صديقي القديم، وأول واحد خطر على بالي عشان اشتكيله ولكن النتيجة إنه المرة دي مسمعنيش زي زمان، محستش براحة معاه، معدتي أساساً رفضت الأكل وجالي تلبك لكن مش هو ده السبب، السبب الحقيقي اني محستش بالسعادة المنتظرة وأنا بأكل ولا بعد الأكل، وهنا احترت جداً، ليه صديقي الأثير أتخلى عني!

صديقي  متخلاش عني بصراحة، انا اللى تخليت عنه، حطيته في وضعه الحقيقي، حاجة بناكلها عشان جسمنا محتاجها ونستمتع بطعمها، مبتحلش أزماتنا، مبتخففش ألمنا ومبتقفش جنبنا.

في الحقيقة أول ما بدأت الدايت كانت عندي العزيمة والإصرار اللى خلوني اتجاهل حبي الشديد للأكل، وأخليه يطلع يوم الفري بس، لكن بالتدريج مبقاش الفري يوم الانتقام، أه باكل كل الممنوعات بس مبقتش بحضر المنيو من الأسبوع اللى قبله زي زمان، أو أزعل أوي لما يفوت الفري من غير أكلة عظيمة.

مثلاً الفري الجاي أنا نفسي أكل سينابون، لكن محضرتش أي حاجة تانية، ولا مهتمة بنوعية الغدا اللى هاكله، مهتمة أكتر إني أنزل ال 400 جرام اللى فاضلين في تارجت الأسبوع ده.

حقيقة تانية أنا في أوقات بفتقد صديقي القديم الأكل، لما بكون غضبانة ومتضايقة ومش لاقية حاجة أطلع فيها الأحساسيس دي بحس شوية بالضياع، لكن بفتكر تاني أن الإحساس ده كاذب غير منطقي ولا حقيقي وأن الإشباع كان بيحصل لدقائق بس ليس أكثر وبعد كده بيجي وراه ندم وضيق زيادة، وأن الأكل عمره ما كان صاحبي الوحيد.

حالياً أنا بدل ما بصحى أفكر هاكل إيه النهاردة عشان أنسى أحزاني، بفتح فولدر الأفلام وأختار فيلم اليوم، وأطلع رواية أقزقز فيها، أو أبدأ شات مع صديقاتي.

مراجعة لبرنامج 30 day shred

30 day shred  كان أول لقاء ليا مع جيليان مايكلز، الست اللى كل مرة كنت بتمرن معاها كنت بحترمها أكتر، وأكتر واحدة جسمي أتغير على إيديها وجربتلها برامج كتير ولسه في برامج ناوية أجربها كمان إن شاء الله.
البرنامج من 30 يوم، وعلى 3 مراحل، كل مرحلة 10 أيام وبينهم يوم أجازة.
ميزة البرنامج إنه خليط من تمارين الكارديو وتمارين القوة، وبالتالي تقريباً مش محتاج تعمل حاجة تانية معاه إلا لو كنت عايز نتيجة أسرع، أنا كنت بعمل معاه الأول تمارين كارديو وبعدين غيرت وبقيت أشتغل برنامج تاني لجيليان هتكلم عنه بعدين.
لو دورت على النت هتلاقي صور كتير لناس جربوا البرنامج وحاطين صورهم قبل وبعد، في الحقيقة الناس دي مبتكدبش ولا بتبالغش ولا الصور دي فوتوشوب.

الصورة دي مثلاً أنا كنت ببصلها كل شوية وأقول إزاي في شهر، لكن في الحقيقة ده اللي حصل بالضبط، التمرين أثره سحري!
زي ما قلت هو 3 فيديو، كل فيديو حوالي نص ساعة بالتسخين وتمارين الإسترتش في النهاية، مش ممل نهائي.
مستوى اللياقة:
البرنامج محتاج مستوى لياقة متوسط، يعني مينفعش حد يكون مبيلعبش رياضة نهائي ويجربه هيتعب ومش هيقدر يكمل، يفضل قبلها بشهر مثلاً يكون تدرج في التمارين، ما بين الكارديو والتمارين التقوية، من خفيف لأشد، وساعتها هيكون مهيأ، أو ممكن يجرب البرنامج اللى عملته جيليان للمبتدئين بنفس التكنيك وهو   30day shred for beginners أنا مجربتش البرنامج الأخير لكن ليا أصدقاء جربوه بيشيدوا بيه.
لتحميل برنامج 30 day shred :
https://cloud.mail.ru/public/2B1znmUWBJFT/30_day_Shred_2007
لتحميل برنامج 30day shred for beginners:
https://cloud.mail.ru/public/4JrbsNEhpqzK/Beginner_Shred_2014

مكرونة بالوايت صوص والفراخ دايت

انا من عشاق المكرونة، وبما اني بقالي مدة شبه مبطلاها بسبب الدايت، قررت من يومين إني اعملها بطريقة دايت قدر الإمكان، ولازم نعرف أن المكرونة في حد ذاتها مش كائن شرير، بس المهم ناكل منها قد ايه ومعمولة ازاي.

مشكلتي مع المكرونة بالوايت صوص إني كنت بعمل الصوص زي البشاميل، يعني دقيق وزيت ولبن وكريمة، وده كارثة في حد ذاتها، فعملت تحوير في الوصفة خلتها أخف وبرضه أكلت في حدود الحصص الغذائية بتاعتي.

المكونات:

·         مكرونة أي شكل مسلوقة ومش مشطوفة.

·         ملعقة كبيرة دقيق.

·         صدور دجاج مخلية مقطعة مكعبات.

·         مشروم طازج (اختياري).

·         بصلة مقطعة شرائح.

·         ملح، فلفل، زعتر أو ريحان.

·         حليب خالي الدسم.

الطريقة:

1.      في حلة تيفال نضع البصلة ثم قطع الدجاج على نهار هادية لغاية لما تستوي.

2.      نضيف الملح والفلفل ومعلقة دقيق.

3.      نقلب معلقة الدقيق ثم نضيف حليب بكمية متناسبة مع المكرونة اللى هنستخدمها.

4.      نسيب الصوص يتقل شوية وندوقه ونتأكد إنه مش محتاج ملح أو فلفل.

5.      نضيف المشروم الطازج والمكرونة.

6.      نرش الزعتر أو الريحان ونقدم.