مكرونة بالوايت صوص والفراخ دايت

انا من عشاق المكرونة، وبما اني بقالي مدة شبه مبطلاها بسبب الدايت، قررت من يومين إني اعملها بطريقة دايت قدر الإمكان، ولازم نعرف أن المكرونة في حد ذاتها مش كائن شرير، بس المهم ناكل منها قد ايه ومعمولة ازاي.

مشكلتي مع المكرونة بالوايت صوص إني كنت بعمل الصوص زي البشاميل، يعني دقيق وزيت ولبن وكريمة، وده كارثة في حد ذاتها، فعملت تحوير في الوصفة خلتها أخف وبرضه أكلت في حدود الحصص الغذائية بتاعتي.

المكونات:

·         مكرونة أي شكل مسلوقة ومش مشطوفة.

·         ملعقة كبيرة دقيق.

·         صدور دجاج مخلية مقطعة مكعبات.

·         مشروم طازج (اختياري).

·         بصلة مقطعة شرائح.

·         ملح، فلفل، زعتر أو ريحان.

·         حليب خالي الدسم.

الطريقة:

1.      في حلة تيفال نضع البصلة ثم قطع الدجاج على نهار هادية لغاية لما تستوي.

2.      نضيف الملح والفلفل ومعلقة دقيق.

3.      نقلب معلقة الدقيق ثم نضيف حليب بكمية متناسبة مع المكرونة اللى هنستخدمها.

4.      نسيب الصوص يتقل شوية وندوقه ونتأكد إنه مش محتاج ملح أو فلفل.

5.      نضيف المشروم الطازج والمكرونة.

6.      نرش الزعتر أو الريحان ونقدم.

Walk at home

ونقول بسم الله ونتكلم عن بدايتي مع الرياضة، واللي كانت مع الست الطيبة ليزلي سانسون، البرنامج ده ببساطة بيتيح لأي حد يمشي في بيته، اه والله وفي بيته، حتى لو بيتك ده متر في متر تقدر تعمل فيه التمرين ده وتمشي ميل أو اثنين أو ثلاثة أو أربعة.

كل اللي انت محتاجه رجليك وبس، ولو حابب تزود قوة التمرين دامبلز خفيف هيكون كافي تماماً.

التمارين زي ما قولت موجودة بدرجات مختلفة عشان تلائم كل الناس سواء من حيث المجهود أو الوقت، وبمعدل الميل في ربع ساعة، والميل حوالي كيلو ونص، يعني لو عملت النهاردة فيديو الربع ساعة كده انت مشيت كيلو ونص، وهكذا.

أنا بدأت بربع ساعة لمدة أسبوع، وزودت بالتدريج بحيث كل أسبوع أزود ميل، لغاية لما وصلت للميل الرابع، لكن بعد كده تراجعت للثالث عشان من رأي هو الأشد بالإضافة لأني كنت في الوقت ده بدأت أدخل تمارين لتقوية العضلات مع المشي ودي هتكلم عنها بعدين.

مميزات تمارين Walk at home:

1.      تمارين سهلة للغاية، مفيش أسهل من المشي، مش محتاجة لياقة عالية أو تتمرن على حركات صعبة، أو يكون وزنك خفيف.

2.      التمارين ملائمة لكل الأوزان ولكل الأعمار، في ناس في الفيديو الرابع معديين السبعين وبيتمرنوا عادي مالكش حجة.

3.      مش محتاجة مساحة، ومش محتاجة أدوات إلا لو كنت حابب تزود من قوة التمرين وتستخدم أوزان خفيفة كيلو أو إثنين وده بيكون من أول الفيديو الثاني الخاص ب 2 ميل.

4.      فعالة جداً، مشي كيلو ونص أو 3 كيلو مش حاجة بسيطة خصوصاً لو أنت في بداية مشوار الرياضة والدايت وأقصى رياضة ليك كانت المشي للحمام وبعدها التقوقع على الكنبة، وبالتالي النتائج هتكون واضحة وسريعة في لياقتك، وفي وزنك كمان لو كنت ماشي على نظام أكل صحي.

5.      بالنسبة لمحبي المنزل زي والكسالى والأمهات التمرين مش محتاج تنزل من البيت أو تلبس لبس خاص، شغل الفيديو على التليفزيون أو اللاب أو التاب وابدأ يا معلم.

6.      في من كل مستوى أكتر من فيديو، بيكون بينهم تنويع بين التمارين عشان لو مشيت على مستوى واحد لوقت طويل متهزهقش أو تمل. 

لينك مشاهدة وتحميل البرنامج بمستوياته على اليوتيوب:

https://www.youtube.com/results?search_query=walk+at+home+leslie+sansone

الرياضة إدمان الأصحاء

أعتقد أن مش انا لوحدي اللى مشكلتنا مع الوزن الزائد نفسية اكثر من أي حاجة تانية، مقدرش أنكر أن الأكل كان أكتر حاجة و أكتر حد مخلص ليا في حياتي، عمرك شفت بيتزا مثلاً مبتقفش جنبك وأنت مهموم، ساندوتش الشاورما دايماً بيحتوي مشاعرك الفياضة ولا لا !

من الأخر الأكل ليا تحول لإدمان، زي اللى بيدمن السجائر عشان يطلع فيها همه، وبيدمن المخدرات عشان ينسى بيها الدنيا، أنا كنت مدمنة أكل، وبقول ما هو إدمان أقل ضرر أكيد.

بس الحقيقة دي كذبة، وإدمان الأكل مكانش الأقل ضرر، الإدمان ده خلاني أطلع على السلم وأنا ركبي بتوجعني وسني معداش الثلاثين، والإدمان ده كان مخليني مش حابه نفسي ولا جسمي ولا مبسوطة منه، الإدمان ده كان مخليني من جوايا ضعيفة، عشان حاسة إني مكسورة قدام حاجة أقوى مني مقدرش استغنى عنها.

مش هحكي بقى حكاية الدايت تاني، بس هحكي بقى إدماني البديل.

أيوه يا جماعة دلوقت أنا مدمنة حاجة جديدة، بس المرة دي حاجة صحية ميه الميه، هي مش ميه الميه قوي طبعاً عشان زي أي حاجة تانية الرياضة الإسراف فيها ممكن يعمل مشاكل مختلفة لكن خلينا متفقين أن لا صحتي ولا لياقي ولا وقتي يسمحوا بالإسراف.

بعد الدايت بأسبوع بدأت رحلتي مع الرياضة كنت متفقة من الأول مع سالي صديقتي وطبيبتي ومرشدتي في الدايت إني معملش رياضة ابداااااً، انا لا عندي وقت ولا دماغ للكلام الفراغ ده.

بس بعد أسبوع أغرتني وقالتلي بس ربع ساعة من تمارين Walk at home ربع ساعة مش هتاخد من وقتي كتير وأجرب.

جربت وحبيت ليزلي صاحبة برنامج المشي من البيت العبقري ده، والأسبوع اللى بعده الربع ساعة بقت نص، وشوية ونطيت على الثلاث أرباع ساعة، وبقيت بمشي في البيت 3 ميل يومياً، أي ما يعادل 4 كيلو ونص، شايفين الرقم مبهر إزاي.

بالنسبة لي الرياضة كانت أهم في رحلتي من الدايت نفسه، الرياضة كانت حافز وعامل مساعد في نفس الوقت، حبيتها وحبيت الأدوات الرياضية، استلفت أول دامبلز كيلو من أختي، وبعد شهر أشتريت دامبلز 2 كيلو ودامبلز كيلو كمان.

مالتزمتش بتمارين Walk at home  بس، أنا كمان قريت وعرفت ودورت لغاية لما لقيت حاجات تانية، وبقيت أبدل بين البرامج الرياضية بين وقت للتاني، وده لتمرين عضلات مختلفة وكمان عشان مزهقش.

رحلتي مع الرياضة عرفتي على جسمي لأول مرة فعلاً، عرفت يعني إيه مجموعات عضلات أساسية، بصيت لنفسي في المراية وبعد ما كنت بشوف نفسي كتلة هلامية من الدهون عرفت فين عيوبي، ودورت على تمارين دراعات وتمارين للبطن وتمارين للرجلين، واتعلمت إزاي اللعبهم مع بعض من غير ما أرهق نفسي.

المرحلة اللى بعدها بقيت بتابع مدربين معينين مريحيني زي جيليان مايكلز اللى بدين ليها بالكتير من الفضل، واللى نفسي ابعتلها مرة على الانستغرام أقولها في واحدة من مصر بتقولك بحبك يا ست الكل.

المهم نرجع ونقول ليه الرياضة إدمان، عشان الرياضة بتضخ في جسمي هرمونات السعادة، ولما ببتعد عنها لاحظت إني بحس بالإحباط والاكتئاب.

على سبيل المثال امبارح كان يوم صعب عليا، مزاج سيئ مع صيام مع قلة أكل، لدرجة إني فكرت أنام الساعة 7 من كتر الملل، بس استعنت بالله وقولت أجرب برنامج Insanity  اللى عندي بقاله مدة وخايفة ابدئه عشان عارفة قد ايه صعب.

اليوم الأول كان اختبار لياقة، والحمد لله اكتشفت ان لياقي بعد التمرين لمدة 10 شهور تقريباً، بقى مستواها كويس، وإني قد البرنامج اللى يعتبر من الأصعب، بعد التمرين حسيت إني واحدة تانية، قدر اكمل شغلي واتفرج على فيلمين كمان ورا بعض.

الرياضة لو كانت إدمان فعلاً فده إدمان أتمنى مبطلوش ابداً، وربنا يبعد عنا شر الإصابات والكرامبات والذي منه.