أعتقد أن مش انا لوحدي اللى
مشكلتنا مع الوزن الزائد نفسية اكثر من أي حاجة تانية، مقدرش أنكر أن الأكل كان
أكتر حاجة و أكتر حد مخلص ليا في حياتي، عمرك شفت بيتزا مثلاً مبتقفش جنبك وأنت مهموم،
ساندوتش الشاورما دايماً بيحتوي مشاعرك الفياضة ولا لا !
من الأخر الأكل ليا تحول
لإدمان، زي اللى بيدمن السجائر عشان يطلع فيها همه، وبيدمن المخدرات عشان ينسى
بيها الدنيا، أنا كنت مدمنة أكل، وبقول ما هو إدمان أقل ضرر أكيد.
بس الحقيقة دي كذبة، وإدمان
الأكل مكانش الأقل ضرر، الإدمان ده خلاني أطلع على السلم وأنا ركبي بتوجعني وسني
معداش الثلاثين، والإدمان ده كان مخليني مش حابه نفسي ولا جسمي ولا مبسوطة منه،
الإدمان ده كان مخليني من جوايا ضعيفة، عشان حاسة إني مكسورة قدام حاجة أقوى مني
مقدرش استغنى عنها.
مش هحكي بقى حكاية الدايت
تاني، بس هحكي بقى إدماني البديل.
أيوه يا جماعة دلوقت أنا
مدمنة حاجة جديدة، بس المرة دي حاجة صحية ميه الميه، هي مش ميه الميه قوي طبعاً
عشان زي أي حاجة تانية الرياضة الإسراف فيها ممكن يعمل مشاكل مختلفة لكن خلينا
متفقين أن لا صحتي ولا لياقي ولا وقتي يسمحوا بالإسراف.
بعد الدايت بأسبوع بدأت
رحلتي مع الرياضة كنت متفقة من الأول مع سالي صديقتي وطبيبتي ومرشدتي في الدايت
إني معملش رياضة ابداااااً، انا لا عندي وقت ولا دماغ للكلام الفراغ ده.
بس بعد أسبوع أغرتني
وقالتلي بس ربع ساعة من تمارين Walk at home ربع ساعة مش
هتاخد من وقتي كتير وأجرب.
جربت وحبيت ليزلي صاحبة
برنامج المشي من البيت العبقري ده، والأسبوع اللى بعده الربع ساعة بقت نص، وشوية
ونطيت على الثلاث أرباع ساعة، وبقيت بمشي في البيت 3 ميل يومياً، أي ما يعادل 4
كيلو ونص، شايفين الرقم مبهر إزاي.
بالنسبة لي الرياضة كانت
أهم في رحلتي من الدايت نفسه، الرياضة كانت حافز وعامل مساعد في نفس الوقت، حبيتها
وحبيت الأدوات الرياضية، استلفت أول دامبلز كيلو من أختي، وبعد شهر أشتريت دامبلز
2 كيلو ودامبلز كيلو كمان.
مالتزمتش بتمارين Walk at home بس، أنا كمان قريت وعرفت ودورت لغاية
لما لقيت حاجات تانية، وبقيت أبدل بين البرامج الرياضية بين وقت للتاني، وده
لتمرين عضلات مختلفة وكمان عشان مزهقش.
رحلتي مع الرياضة عرفتي على
جسمي لأول مرة فعلاً، عرفت يعني إيه مجموعات عضلات أساسية، بصيت لنفسي في المراية
وبعد ما كنت بشوف نفسي كتلة هلامية من الدهون عرفت فين عيوبي، ودورت على تمارين
دراعات وتمارين للبطن وتمارين للرجلين، واتعلمت إزاي اللعبهم مع بعض من غير ما
أرهق نفسي.
المرحلة اللى بعدها بقيت
بتابع مدربين معينين مريحيني زي جيليان مايكلز اللى بدين ليها بالكتير من الفضل،
واللى نفسي ابعتلها مرة على الانستغرام أقولها في واحدة من مصر بتقولك بحبك يا ست
الكل.
المهم نرجع ونقول ليه
الرياضة إدمان، عشان الرياضة بتضخ في جسمي هرمونات السعادة، ولما ببتعد عنها لاحظت
إني بحس بالإحباط والاكتئاب.
على سبيل المثال امبارح كان
يوم صعب عليا، مزاج سيئ مع صيام مع قلة أكل، لدرجة إني فكرت أنام الساعة 7 من كتر
الملل، بس استعنت بالله وقولت أجرب برنامج Insanity اللى عندي بقاله مدة وخايفة ابدئه عشان عارفة قد
ايه صعب.
اليوم الأول كان اختبار
لياقة، والحمد لله اكتشفت ان لياقي بعد التمرين لمدة 10 شهور تقريباً، بقى مستواها
كويس، وإني قد البرنامج اللى يعتبر من الأصعب، بعد التمرين حسيت إني واحدة تانية،
قدر اكمل شغلي واتفرج على فيلمين كمان ورا بعض.
الرياضة لو كانت إدمان
فعلاً فده إدمان أتمنى مبطلوش ابداً، وربنا يبعد عنا شر الإصابات والكرامبات والذي
منه.
ليست هناك تعليقات:
إرسال تعليق